ភ្នំពេញ៖ នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានលើកឡើងថាគោលដៅរបស់រដ្ឋក្នុងការដោះស្រាយវិវាទរវាងពលរដ្ឋនិងបុរីមិនមែនជាការផ្សព្វផ្សាយយកមុខខ្លួនឯងនោះទេ ប៉ុន្តែគឺជាយុត្តិធម៌ដែលមានសម្រាប់ប្រជាពលរដ្ឋ។

សម្ដេចលើកឡើងបែបនេះនៅក្នុងពិធីបិទសន្និបាតការងារឆ្នាំ២០២៤ ក្រសួងរៀបចំដែនដីនៅរសៀលថ្ងៃទី២៦ ខែវិច្ឆិកា ឆ្នាំ២០២៤ ដោយបានប្រាប់ពីមូលហេតុអ្វីដែលសម្ដេចស្ងាត់ស្ងៀមចំពោះករណីវិវាទរវាងពលរដ្ឋនិងបុរីក្នុងរយៈពេល ១៥ខែកន្លងមកនេះ។ សម្ដេចបានលើកឡើងថាសម្ដេចបានធ្វើការងារច្រើនទៅលើរឿងនេះដោយស្ងៀមស្ងាត់ ដោយផ្ដោតសំខាន់ជាពិសេសទៅលើយុត្តិធម៌របស់ប្រជាពលរដ្ឋជាជាងការផ្សព្វផ្សាយ។

សម្ដេចថា៖ «ធ្វើខ្លះយើងស្ងាត់ធ្វើខ្លះយើងផ្សាយរឿងមួយ ប៉ុន្តែអ្វីដែលសុំឱ្យបងប្អូនប្រជាពលរដ្ឋទាំងអស់ជឿទុកចិត្តថា រដ្ឋាភិបាលមិនបានឃើញទុក្ខលំបាកប្រជាជនហើយនៅស្ងៀមនោះទេក្នុងរយៈពេល ១៥ខែនេះ»។

ជាមួយគ្នានៅសម្ដេចក៏បានលើកឡើងពីករណីអតីតឧកញ៉ាពីរនាក់គឺ ឡេង ចាន់ណានិង លោក ជាសារ៉ន ផងដែរដែលពេលនេះកំពុងស្ថិតនៅក្នុងវិធានការរបស់តុលាការ។

សម្ដេចធិបតីបានលើកឡើងថា វិវាទបុរីគឺជាករណីប្រវត្តិសាស្ត្រនៅកម្ពុជាដែលមិនធ្លាប់មានពីមុន បញ្ហានេះគឺត្រូវដោះស្រាយដោយមានភាពបត់បែន សម្របសម្រួល គោរពគោលការណ៍ច្បាប់ និងបច្ចេកទេសក្នុងការដោះស្រាយ។

សម្ដេចថា ការយកនយោបាយទៅលូកដៃក្នុងបច្ចេកទេសគឺដោះមិនចេញនោះទេ។ ជាមួយគ្នានោះសម្ដេចក៏បានចេញនូវវិធានការមួយចំនួនទាក់ទងជាមួយនឹងពន្ធប្រថាប់ត្រាផងដែរ ខណៈចរន្តនៃការទិញផ្ទះកំពុងតែកើនឡើងវិញដែលសម្ដេចថាបញ្ហាកំពុងដោះស្រាយបានហើយ៕